لوحتــــــــــان
-------
ساقية و شجرة توت في ورقة بيضة على المكتب
و قلب ساعة غروب هيمان في بنت سمرا فوق مركب
و الموج عالي و بحر الهوا غدار يا مين يداوي يا مين يطبطب
***
و فارس في المعركة راكب حصان أبيض رافع راية الحق
و الرايه للأسف مقطوعة بس سيفه بينطق بصدق
بيصرخ في الثوار اتجمعوا ده احنا بالحرية أحق
ذلوا الذل و خدوا بالتار و توكلوا على الوكيل الحق
***
و سمرا ، و هي سمرا في سمار الليل ، في سواد الليل بتبكي
من الوحدة و الخوف و القلق بس ساجده لربنا بتدعي
بدموع عينيها و كل شيئ حواليها خاشع معاها بيشكى
لرب العباد يارب يرجع حبيبها منصور و صوته بيدوى
***
و في المعركة اتلم الفرسان و التقى الجمعان
فريق ظالم .. بظلمة عارف و فرحان
و فريق مقهور و طالع عين اهله و غلبان
بس من نصر الله واثق و متأكد من شجاعة الشجعان
و غراب اسود على فرع ميت بينادي على الغربان
***
و لسه سمرا سارحة ساجده بتسبح بعظمة ربنا
في ملكوته هايمة بروحها و جسدها عايش وسطنا
و عنيها على المعركة مستنية تسمع صوت عزنا
و ليله غاب فيها القمر و صوت الحرب بيهزنا
و سؤال حاير ياترى الأرض أرضهم و للا أرضنا
***
صليل السيوف عالي و صيحة الحق بتشق قلب الليل
و ليله ضلمة زحمة و سيف و رمح و درع و خيل
و كعادتها الحياه من يومها حرب بين شر و خير
و فارسنا فوق فرسه أسد واهب روحه لله و روحه قليل
بسيفة طير رقاب عشرة و الحداشر خلاه عليل
و الاتناشر رأس الأفعى و دلاديله كتير كتير كتير
***
وقفت و جريت تبص للسما و مدت ايديها لفوق
و سمار وشها اصبح نور على نور و في عنيها لهفة و شوق
حست بقرب اللقى ، لقى الله و رسوله ثم لقى المعشوق
و الموج علي و الريح شديده و سيل عارم و قلب مخنوق
و تقع في البحر سمرا و تغرق و بين الشهداء تفوق
***
و بين الجثث يتعثر و يقع و في قلبه يتغرس سهم
و روحه طالعة بتنادي رايه الحق ارفعوها الحرية مش وهم
و لو المرة دي انتصروا فمش دايما بينتصر الظلم
لابد من يوم يظهر فيه الحق و ينتهي الهم و الغم
مادام عندنا فوارس من أرواحهم و من أنفسهم الحرية أهم
***
و تاني يتجمعوا الأحباب من بعد فراق و بعد
أرواح طايره تحت عرش ربنا مستنيين يوم الوعد
و التيجان على راسهم أفضل من السماوات و الأرض
جنة و خلود و فرح من بعد هموم و قلق و سهد
و يارب الحقنا بيهم و ارزقنا في الدنيا الزهد
***
المشاركات
ليست هناك تعليقات:
إرسال تعليق