يا مواسيرك يا مصـــــــــــر
ــــــــــــــ

كالعادة قمت من النوم الصبح أخدت دش و لبست هدومي و نزلت عشان أروح الشغل و أبص ألاقي الشارع بتاعنا غرقان ميه انا قولت يمكن مطرت بليل و انا نايم .. عادي .. ومحطتش في دماغي .. و كملت مشي لحد ما طلعت على شارع الهرم و لا قيت شارع الهرم برضه غرقان ميه انا قولت عادي يمكن بلاعات الصرف اللي على أجناب الطريق مسدوده و للا حاجه .. و كان الشارع واقف تماما مفيش عربيات بتمشي قولت عادي مهي مصر طول عمرها زحمة حاجه مش جديده غير اننا في أول الأسبوع و المنظر ده مألوف بالنسبة لي
كملت مشي لحد ما عديت مسرح عادل إمام و الوضع هو هو و الطريق واقف تماما مبيمشيش و كان المفروض أعدي الشارع بس للأسف ملاقيتش مكان أعدي منه بسبب المية اللي مرتفعة عن الأرض ييجي بشبر كده تقريبا كملت مشي على نفس الجانب و قولت أعدي من عند شارع العريش و بضرب بعيني لاقيت منظر عجيب جدا
أبص ألاقي في نص الشارع عربية مخسوف بيها الأرض غطسانة في قلب الأسفلت و لما سألت قالولي ان ماسورة المياة ضربت و الأرض هبطت و من حظ العربية دي انها كانت معدية في الوقت ده
بالعقل كده إستحالة الأسفلت يهبط في نفس اللحظة اللي هتضرب فيها ماسورة المياه - معنى الكلام ده ان الماسورة ضربت من فترة و الأرض كانت بتشربها و تخزنها لحد ما الأرض ضعفت و بعدين الجزء ده هبط - طيب جميل - طبعا كلكم عارفين إن شارع الهرم لسة جديد مبقالوش سنتين تلاته يعني المفترض انه على الأقل ما تحصلش فيه حاجه زيي دي على الأقل لمدة 25 سنة ماعلينا - احنا عارفين انهم كانوا بيستغلوا موضوع توسيع شارع الهرم عشان يسرقولهم قرشين من ميزانية الدولة - الجديد بقى ان نفس الماسورة اللي ضربت دي ضربت من حوالي 5 شهور
مش عارف ليه ربنا ما بيباركش في شغلهم يظهر فلوسهم حرام و للا ايه